ជាលើកទី១ អត្រារូបិយវត្ថុរុស្ស៊ីធ្លាក់ដល់ជាង ៣៨រូប្ល ក្នុង១ដុល្លារ ស.រ.អា
ការធ្លាក់នេះ ត្រូវបានគេកត់ត្រានៅលើ ”ទីផ្សាររូបិយវត្ថុអន្តរធនាគារក្រុងម៉ូស្គូ “ ដែលគ្រាន់តែបើកទ្វារ ចាប់ដំណើរការឡើងវិញ នៅថ្ងៃចន្ទ ទី១៥ កញ្ញា ដើមសប្តាហ៍នេះ គឺ រង ភ្លាមភ្លែត ចំហាយនៃទណ្ឌកម្មបន្ថែម ពីខាងបស្ចិមលោក ដាក់ កាលពីចុងសប្តាហ៍មុន ទល់នឹង រុស្ស៊ី ដើម្បីបន្សោយសេដ្ឋកិច្ចរុស្ស៊ី ឲ្យបានមែនទែន ដោយមកពី នយោបាយក្រុងម៉ូស្គូ ចំពោះ វិបត្តិ នៅអ៊ុយក្រែន។
ចុះផ្សាយនៅថ្ងៃ៖
ទន្ទឹមនឹងទណ្ឌកម្មពីខាងសហភាពអឺរ៉ុប និង ស.រ.អា. តាមអ្នកវិភាគ គឺមានកត្តាចម្បងពីរ ដែលញ៉ាំងឲ្យ ប្រាក់រូប្ល រុស្ស៊ី បន្តចុះតម្លៃ ពោលគឺថា ៖ ទី១- មកពីថ្លៃប្រេង នៅលើទីផ្សារ ពិភពលោក នាពេលចុងក្រោយ ចេះតែស្រុតចុះទៅ វាប៉ះពាល់ដល់ ថវិកាជាតិរុស្ស៊ី ដែល អាស្រ័យយ៉ាងបង្គួរ នឹងខ្ទង់ចំណូល បានមកពីការនាំចេញនៃថាមពលនេះ , ទី២-អាស្រ័យ ដោយផ្ទាល់តែម្តង នឹងស្ថានការណ៍ នៅអ៊ុយក្រែន គឺថា តាមធម្មតា គ្រាន់តែវិបត្តិនេះចាប់ ធូរស្រាល អត្រាប្រាក់រូប្ល តែងដកកំពស់ឡើងវិញភ្លាម។
ការធ្លាក់ចុះខ្លាំងនៃលុយរូប្ល អាចច្រានអតិផរណា នៅរុស្ស៊ី ដែលឥឡូវ មានកម្រិតដល់៨% ទៅហើយ ឲ្យស្ទុះឡើង ទៅទៀត មកពីរុស្ស៊ី កាលពីដើមខែ សីហា កន្លងទៅ បានចេញបម្រាមហាម មិនឲ្យនាំចូលនូវគ្រឿងបរិភោគអឺរ៉ុប និងអាមេរិកមួយភាគធំ បម្រាមនេះចាប់បង្កឲ្យ កើតឡើង ជាកង្វះខ្លះៗ ម៉្លោះហើយ ជម្រុញឲ្យវាឡើងថ្លៃជាបណ្តើរៗ។
មិនតែប៉ុណ្ណោះម៉ូស្គូព្រមានថា បើបស្ចិមលោក នៅតែបន្តដាក់ទណ្ឌកម្មរុស្ស៊ី នោះរុស្ស អាច នឹងបន្ថយ ឫ ឈប់នាំចូលពីបស្ចិមលោក តែម្តង គឺរថយន្ត សម្លៀកបំពាក់ ទូទឹកកក។ល។
ជាលទ្ធផលនៃការជួញលើទីផ្សាររូបិយវត្ថុនោះ ធនាគារជាតិរុស្ស៊ី បានកំណត់ អត្រាប្រាក់រូប្ល សម្រាប់ ថ្ងៃ១៦កញ្ញានេះ ដូចតទៅ ៖ គឺ ១ ដុល្លារ ស្មើនឹង ៣៧,៩៩ រូប្ល ហើយ ១អឺរ៉ូ ស្មើនឹង ៤៩,២០រូប្ល។ ជាការកត់សម្គាល់ នៅរុស្ស៊ី មាននិយមន័យមួយទៀត គឺ” កញ្ជ្រែងប្រាក់ដុល្លារនិង ប្រាក់អឺរ៉ូ“ ដែលផ្សំឡើង ក្នុងចំណែក៥៥% ពីដុល្លារ និង ៤៥% ពីអឺរ៉ូ ហើយអត្រាកញ្ជ្រែងនេះ ទល់នឹងប្រាក់រូប្ល សម្រាប់ ថ្ងៃ១៦កញ្ញា គឺ ស្មើនឹង ៤៣,០៣រូប្ល។ ធនាគារជាតិបានប្រកាសថា នឹងចូលខ្លួនធ្វើអន្តរាគមន៍ ដោយចំណាយ ១លើកៗ គឺ ៣៥០លានដុល្លារ ដើម្បីគាំទ្រប្រាក់រូប្ល លុះណាតែ កញ្ជ្រែងនេះ ឡើងដល់ថ្លៃ ៤៤,៤០រូប្ល។
បច្ចុប្បន្ន ស្តុករូបិយវត្ថុ និងមាសរបស់ធនាគារជាតិរុស្ស៊ី មានទំហំ ៤៦៤.០០០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ