មេធាវីការពារសិទ្ធិមនុស្សចិនម្នាក់ ជាប់ពន្ធនាគារ ៤ឆ្នាំកន្លះ ពីបទវិទ្ធង្សនា
នៅថ្ងៃចន្ទ ទី២៨ មករានេះ មេធាវីការពារសិទ្ធិមនុស្សចិន ដ៏លេចធ្លោម្នាក់គឺលោកវ៉ាង គ័នចាង (Wang Quanzhang) ត្រូវតុលាការក្នុងប្រទេសចិន កាត់ទោសឲ្យជាប់ពន្ធនាគាររយៈពេល៤ ឆ្នាំ កន្លះ ដោយចោទពីបទប្រព្រឹត្ត វិទ្ធង្សនា កាលពីឆ្នាំ ២០១៥ កន្លងទៅ។ បន្ទាប់ពីតុលាការចិន ប្រកាសសេចក្តីសម្រេចនេះរួចមក ក្រុមអង្គការឃ្លាំមើលសិទ្ធិមនុស្ស បួករួមទាំងអង្គការ Amnesty International បានបញ្ចេញប្រតិកម្មថា នេះ គឺជាការសម្រេចមួយដែលអយុត្តិធម៌បំផុតសម្រាប់ លោកវ៉ាង គ័នចាង។
ចុះផ្សាយនៅថ្ងៃ៖ កែប្រែថ្ងៃទី៖
ស្ថិតក្នុងវ័យ ៤២ ឆ្នាំ លោកវ៉ាង គ័នចាង ត្រូវគេស្គាល់ថាជាមេធាវីម្នាក់ដ៏សកម្ម ក្នុងការការពារក្តីឲ្យសកម្មជននយោបាយ និង ជនរងគ្រោះដោយសារការរំលោភយកដីធ្លី នៅក្នុងប្រទេសចិន។ លោកវ៉ាង បានបាត់ខ្លួនក្នុងការការបង្ក្រាបមួយរបស់អាជ្ញាធរចិន ដែលគេស្គាល់ឈ្មោះថា ការបង្ក្រាប “៧០៩”។ ជាសកម្មភាពបង្ក្រាប ដែលរដ្ឋចិនថា ធ្វើឡើងដើម្បីកំចាត់ក្រុមអ្នកបះបោរផ្តួលរំលំរដ្ឋអំណាចចិនបច្ចុប្បន្ន។
បើតាមតុលាការចិននៅធានជីន លោកមេធាវី វ៉ាង មានទោសទាក់ទងនឹង អំពើបំបះបំបោរដើម្បីរំលំរំលើងរបបគ្រប់គ្រងរដ្ឋចិន ពិតប្រាកដមែន ហើយលោកត្រូវជាប់ពន្ធនាគាររយៈពេល ៤ ឆ្នាំ ៦ ខែ និងគ្មានសិទ្ធិធ្វើនយោបាយរយៈពេល ៥ឆ្នាំ។
ទាក់ទងរឿងនេះដែរ សូមជ្រាបថា បន្ទាប់ពីរងការចោទប្រកាន់រយៈពេលជាង២ ឆ្នាំ ដោយមិនមានកំណត់កាលបរិច្ឆេទនៃការកាត់ក្តីច្បាស់លាស់ ពោលគឺចាប់តាំងពីឆ្នាំ២០១៦ មក តុលាការចិនបានសម្រេច បើកសវនាការកាត់ក្តីដោយបិទទ្វារ លើករណីលោកវ៉ាង កាលពីខែធ្នូ ឆ្នាំ ២០១៨ កន្លងទៅ។ ការកាត់ក្តី ត្រូវធ្វើដោយបិទទ្វារ ដោយតុលាការសំអាងថា រឿងនេះមានជាប់ពាក់ព័ន្ធទៅនឹង កិច្ចការសម្ងាត់របស់ប្រទេសជាតិ។
មួយវិញទៀត មុនពេលកាត់ក្តីមួយថ្ងៃ ភរិយារបស់លោកមេធាវី វ៉ាង ត្រូវអាជ្ញាធរចិន ដាក់ឲ្យជាប់ឃុំនៅក្នុងផ្ទះ ដែលទង្វើនេះត្រូវគេជឿថា ធ្វើឡើងដើម្បីទប់ស្កាត់កុំឲ្យលោកស្រី អាចទៅចូលរួមក្នុងសវនាការបាន។
ឆ្លើយតបនឹង ការសម្រេចក្តីរបស់តុលាការចិន អង្គការការពារសិទ្ធិមនុស្សជាច្រើន បានចេញមុខរិះគន់ថា នេះគឺជាការកាត់ក្តីដែលអយុត្តិធម៌ខ្លាំងណាស់។ ជាក់ស្តែង មន្ត្រីជាន់ខ្ពស់ខាងផ្នែកស៊ើបអង្កេតម្នាក់ របស់ក្រុមអ្នកឃ្លាំមលើសិទ្ធិមនុស្ស បានពន្យល់ថា ការកាត់ទោសលើរូបលោកមេធាវីវ៉ាង គឺជាផ្នែកមួយនៃការបង្ក្រាបរបស់រដ្ឋាភិលបាលចិន ប្រឆាំងទៅនឹង ក្រុមមេធាវីការពារសិទ្ធិមនុស្សនៅក្នុងប្រទេស។
ពាក់ព័ន្ធរឿងនេះដែរ មន្ត្រីរបស់អង្គការ Amnesty International បានលើកឡើងថា លោកវ៉ាងត្រូវតុលាការចិនកាត់ឲ្យជាប់ពន្ធនាគាររយៈពេល ៤ ឆ្នាំ កន្លះ ក៏ប៉ុន្តែលោកបានជាប់ឃុំឃាំងជាងបីឆ្នាំ កន្លងមកហើយ ដូច្នោះហើយលោកវ៉ាង នឹងត្រូវបានដោះលែងឲ្យមានសេរីភាពឡើងវិញនៅក្នុងរយៈពេលប្រមាណជាជាងមួយឆ្នាំទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ