ចិនដំឡើងសាច់ដុំយោធាដោយធ្វើសមយុទ្ធនៅច្រកសមុទ្រតៃវ៉ាន់
ចិនធ្វើសមយុទ្ធយោធាកងទ័ពមួយនៅច្រកសមុទ្រតៃវ៉ាន់ ដើម្បីជាការដំឡើងសាច់ដុំបន្ទាប់ពីធ្វើការព្រមានយ៉ាងម៉ឺងម៉ាត់ប្រឆាំងទៅនឹងការទាមទារឯករាជ្យភាពរបស់តៃវ៉ាន់។ ប៉ុន្តែតៃវ៉ាន់ហៅការសមយុទ្ធនេះថាជាសមយុទ្ធធម្មតាដូចពីមុនៗ ហើយសមយុទ្ធទ្រង់ទ្រាយធំប្រហែលពុំអាចទៅរួចនោះទេ។
ចុះផ្សាយនៅថ្ងៃ៖
ស្តាប់ - ០១:៤៧
នាថ្ងៃពុធទី១៨នេះ ចិនបានធ្វើសមយុទ្ធនៅច្រកសមុទ្រតែវ៉ាន់ដូចដែលបានប្រកាសកាលពីសប្ដាហ៍មុន។ ក្រៅពីការអោយដឹងថាសមយុទ្ធនេះនឹងធ្វើឡើងរហូតដល់ពាក់កណ្តាលយប់ អាជ្ញាធរចិនពុំទាន់បានបញ្ចេញនូវព័ត៌មានអ្វីផ្សេង ហើយចិនក៏ពុំបានផ្តល់នូវព័ត៌មានលម្អិតស្ដីពីឧបករណ៍យោធាឫកងទ័ពដែលចូលរួមក្នុងសមយុទ្ធនេះដែរ។ តែកប៉ាល និងនានាកំសាន្តនានាបានទទួលដំណឹងអោយជៀសវាងតំបន់មួយចំនួននៃឆ្នេរសមុទ្រចិន ដែលនេះបានធ្វើអោយមានការសង្ស័យថា នាវាផ្ទុកយន្តហោះតែមួយគត់របស់ចិនអាចនឹងចូលរួមក្នុងសមយុទ្ធនេះ។
អ្នកនាំពាក្យក្រសួងការពារជាតិតៃវ៉ាន់បានអោយដឹងថា សមយុទ្ធនេះមានតែកាំភ្លើងធំដែលមានមូលដ្ឋាននៅលើដីនិងមានតែការហ្វឹកហាត់តាមទំលាប់ធម្មតាប៉ុណ្ណោះ ពុំមានការចូលរួមពីនាវាផ្ទុកយន្តហោះដូចដែលបានសន្និដ្ឋាននោះទេ។ លោកបានបន្ថែមទៀតថា ចិនបានចេញផ្សាយពត៌មានក្លែងក្លាយដោយចេតនា ដើម្បីនិយាយបំផ្លើសធ្វើអោយសមយុទ្ធនោះហាក់បីដូចជាមានទ្រង់ទ្រាយធំ នៅពេលដែលការពិតពុំដូច្នោះ។
សមាជិកជាន់ខ្ពស់នៃវិទ្យាស្ថាននយោបាយមួយរបស់តៃវ៉ាន់បានហៅសមយុទ្ធនេះថាជា ជាផ្នែកមួយនៃសង្គ្រាមចិត្តសាស្រ្តរបស់ក្រុងប៉េកាំងប្រឆាំងទៅនឹងតៃវ៉ាន់ ហើយនេះអាចជាមធ្យោបាយមួយដើម្បីបង្វែរការយកចិត្តទុកដាក់របស់អ្នកសារព័ត៌មានពីដំណើរទស្សនកិច្ចនៅបរទេសរបស់លោកស្រីប្រធានាធិបតីតៃវ៉ាន់ Tsai Ing-Wen អោយមករាយការណ៍អំពីសមយុទ្ធយោធានេះវិញ។
លោក Liu Jieyi ប្រធានការិយាល័យកិច្ចការតៃវ៉ាន់របស់ចិនបាននិយាយកាលពីថ្ងៃចន្ទថា សមយុទ្ធនេះគឺជា សកម្មភាពដើម្បីការពារអធិបតេយ្យភាពនិងបូរណភាពទឹកដីនៃមាតុភូមិរបស់ចិន ។
សូមរំលឹកថា កាលពីថ្ងៃទី២០ខែមីនា ប្រធានាធិបតីចិនលោកស៊ីជីនភីង បានធ្វើការព្រមានតាមរយៈសុន្ទរកថាមួយថា ទង្វើនិងល្បិចកលទាំងអស់ដើម្បីបំបែកប្រទេសចិននឹងត្រូវបរាជ័យ។ នៅក្នុងថ្ងៃនោះ នាវាផ្ទុកយន្តហោះរបស់ចិនបានធ្វើដំណើរបង្អួតខ្លួនលើច្រកសមុទ្រតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ