អាប៉ូឡូ៖ ៥០ឆ្នាំក្រោយមក គេចាប់ផ្តើមផ្តោតអារម្មណ៍ខ្លាំងឡើងវិញលើព្រះចន្ទ
ចុះផ្សាយនៅថ្ងៃ៖
ស្តាប់ - ០៥:០៤
ខែកក្កដាខាងមុខនេះ គឺជាខួបគម្រង់ ៥០ឆ្នាំគត់នៃបេសកកម្មអាប៉ូឡូទី១១ ដែលបាននាំមនុស្សជាតិយើងឲ្យជាន់ដីព្រះចន្ទជាលើកដំបូងបង្អស់ កាលពីឆ្នាំ១៩៦៩។ ថ្ងៃអង្គារទី១៨មិថុនានេះ ដែលជាថ្ងៃទីពីរនៃពិព័រណ៍យន្តហោះអន្តរជាតិនៅទីក្រុងប៉ារីស ត្រូវបានគេយកមកផ្តោតជាពិសេសលើបេសកកម្មទៅកាន់ព្រះចន្ទនេះ ដែល៥០ឆ្នាំក្រោយមក វាកំពុងតែទាក់ទាញចំណាប់អារម្មណ៍យ៉ាងខ្លាំងឡើងវិញ។
បេសកកម្មអាប៉ូឡូ ដែលនាំមនុស្សទៅចុះចតលើដីព្រះចន្ទជាលើកទី១ កាលពីខែកក្កដា ឆ្នាំ១៩៦៩ គឺជាបេសកកម្មអាប៉ូឡូទី១១ ហើយក្រោយៗមកទៀត មានបេសកកម្មអាប៉ូឡូទៅកាន់ឋានព្រះចន្ទ ចំនួន ៦ផ្សេងទៀតត្រូវបានគេធ្វើឡើង មុនពេលដែលទីភ្នាក់ងារណាសាបិទបញ្ចប់គម្រោងនេះ នៅត្រឹមបេសកកម្មអាប៉ូឡូទី១៧ នៅឆ្នាំ១៩៧២។ ចាប់តាំងពីពេលនោះមក មនុស្សយើងមិនដែលវិលត្រឡប់ទៅជាន់ដីព្រះចន្ទសាជាថ្មីទៀតនោះទេ។
តាមការពិតទៅ កាលពីដើមឆ្នាំ២០០៤កន្លងទៅ ប៉ុន្មានខែក្រោយពីចិនបានបញ្ជូនអវកាសយានិករបស់ខ្លួនឲ្យហោះហើរចេញទៅកាន់ទីអវកាសជាលើកដំបូង អាមេរិក ក្រោមអាណត្តិរបស់លោកចច ដាបិលយូ ប៊ូស ធ្លាប់បានសើរើគម្រោងបញ្ជូនមនុស្សទៅកាន់ឋានព្រះចន្ទឡើងវិញម្តងដែរ ដោយនៅពេលនោះ ទីភ្នាក់ងារណាសាគ្រោងបញ្ជូនមនុស្សឲ្យទៅចុះចតលើដីព្រះចន្ទសាជាថ្មី នៅត្រឹមឆ្នាំ២០២០។ ក៏ប៉ុន្តែ គម្រោងនេះត្រូវបានលោកអូបាម៉ាលុបចោលទៅវិញ កាលពីឆ្នាំ២០១០កន្លងទៅ ដោយសារតែមានបញ្ហាថវិកាផង ហើយជាពិសេសជាងនេះទៅទៀត លោកអូបាម៉ាចង់ឲ្យណាសាផ្តោតអាទិភាពតែទៅលើបេសកកម្មទៅកាន់ភពព្រះអង្គារ ជាងទៅព្រះចន្ទ។
ក្រោយពីលោកដូណាល់ ត្រាំ ជាប់ឆ្នោតឡើងមកកាន់តំណែង នៅឆ្នាំ២០១៦ ចំណាប់អារម្មណ៍លើបេសកកម្មទៅកាន់ឋានព្រះចន្ទក៏ចាប់ផ្តើមមានការផុសផុលខ្លាំងឡើងវិញ ហើយនៅឆ្នាំ២០១៧ លោកដូណាល់ ត្រាំ ក៏បានចេញបទបញ្ជាឲ្យទីភ្នាក់ងារណាសារៀបចំគម្រោងបញ្ជូនមនុស្សឲ្យទៅចុះចតលើដីព្រះចន្ទសាជាថ្មី ដោយគ្រោងធ្វើឲ្យបាននៅត្រឹមឆ្នាំ២០២៤ខាងមុខ។
នៅក្នុងអំឡុងពេលជាមួយគ្នានោះ ចិនក៏បានបង្កើនល្បឿននៃកម្មវិធីអវកាសរបស់ខ្លួនគួរឲ្យកត់សម្គាល់ផងដែរ រហូតបានទទួលជោគជ័យក្នុងការបញ្ជូនយានគ្មានមនុស្សបើកឲ្យទៅចុះចតនៅផ្នែកម្ខាងទៀតនៃឋានព្រះចន្ទ កាលពីខែមករាកន្លងទៅ ហើយព្រមទាំងគ្រោង បញ្ជូនមនុស្សឲ្យទៅចុះចតលើដីព្រះចន្ទ នៅក្នុងរយៈពេល១០ឆ្នាំខាងមុខ។
គួរបញ្ជាក់ថា គិតរហូតមកទល់នឹងពេលនេះ សហរដ្ឋអាមេរិកគឺជាប្រទេសតែមួយគត់ដែលបានបញ្ជូនមនុស្សទៅជាន់ដីព្រះចន្ទ ហើយបើនិយាយពីបេសកកម្មបញ្ជូនយានគ្មានមនុស្សបើកទៅចុះចតលើដីព្រះចន្ទវិញ ក៏មានតែប្រទេសចំនួន៣ដែរ ដែលធ្លាប់បានធ្វើដោយជោគជ័យ គឺ អាមេរិក រុស្ស៊ី និងចិន ចំណែកឥណ្ឌាវិញ ចង់ក្លាយជាប្រទេសទី៤ ដោយគ្រោងនឹងបាញ់បង្ហោះយានគ្មានមនុស្សបើករបស់ខ្លួន នៅពាក់កណ្តាលខែកក្កដាខាងមុខ ដើម្បីឲ្យទៅចុះចតលើដីព្រះចន្ទ នៅខែកញ្ញា។
គេអាចមើលឃើញមានកត្តាធំៗមួយចំនួន ដែលធ្វើឲ្យគេនាំគ្នាផ្តោតអារម្មណ៍ខ្លាំងលើបេសកកម្មទៅកាន់ឋានព្រះចន្ទ នៅក្នុងពេលបច្ចុប្បន្ននេះ។ ម្យ៉ាង ដោយសារតែព្រះចន្ទ ដែលស្ថិតនៅចម្ងាយត្រឹមតែជាង ៣៨ម៉ឺនគីឡូម៉ែត្រពីភពផែនដី គឺជាទិសដៅដែលជិតជាងគេ ហើយមានភាពងាយស្រួលជាងគេ បើធៀបនឹងបេសកម្មអវកាសផ្សេងទៀត។ ម្យ៉ាងវិញទៀត ការរីកចម្រើនជឿនលឿននៃបច្ចេកវិទ្យា នៅក្នុងពេលបច្ចុប្បន្ននេះ ក៏បានធ្វើឲ្យការធ្វើដំណើរទៅកាន់ឋានព្រះចន្ទត្រូវការចំណាយលុយកាន់តែតិចជាងកាលពីសម័យមុនផងដែរ។
ហេតុដូច្នេះហើយបានជាមានប្រទេសកាន់តែច្រើនឡើងនាំគ្នាបង្ហាញពីមហិច្ឆតាចង់សម្រេចជោគជ័យជាប្រវត្តិសាស្រ្តក្នុងការបញ្ជូនយាន ទាំងមាន ឬគ្មានមនុស្សបើក ឲ្យទៅចុះចតលើដីព្រះចន្ទ។ មែនទែនទៅ មហិច្ឆតាចង់ទៅចុះចតលើដីព្រះចន្ទនេះមិនមែនមានតែប្រទេសនោះទេ សូម្បីតែក្រុមហ៊ុនឯកជនខ្លះ គឺរួមមានក្រុមហ៊ុន SpaceX របស់លោក Elon Musk និងក្រុមហ៊ុន Blue Origin របស់លោក Jeff Bezos ដែលជាម្ចាស់ក្រុមហ៊ុន Amazon ក៏កំពុងតែអភិវឌ្ឍកម្មវិធីអវកាសផ្ទាល់ខ្លួនឯងផងដែរ ក្នុងគោលដៅបញ្ជូនយានឲ្យទៅចុះចតលើឋានព្រះចន្ទ។
ក៏ប៉ុន្តែ ក្នុងពេលជាមួយគ្នា បេសកកម្មទៅកាន់ឋានព្រះចន្ទនេះ ជាពិសេស បេសកកម្មបញ្ជូនមនុស្សឲ្យត្រឡប់ទៅចុះលើដីព្រះចន្ទសាជាថ្មី ក៏តែងតែមានបញ្ហាចម្រូងចម្រាសមិនតិចនោះដែរ ដោយសារតែមានអ្នកខ្លះយល់ថា វាគឺជាការចំណាយលុយច្រើនហួសហេតុសម្រាប់រឿងដែលមិនសូវជាបានប្រយោជន៍ច្រើនមកវិញ។
ទោះជាយ៉ាងណា សម្រាប់ទីភ្នាក់ងារណាសា បេសកម្មបញ្ជូនមនុស្សទៅកាន់ឋានព្រះចន្ទ ដែលគេកំពុងរៀបចំធ្វើនៅពេលនេះ វាមានសារៈសំខាន់ខុសពីលើកមុនៗ ដោយសារតែគេមិនមែនគ្រោងបញ្ជូនមនុស្សឲ្យទៅចុះចតត្រឹមតែប៉ុន្មានម៉ោងដូចមុននោះទេ តែគេគ្រោងបញ្ជូនអវកាសយានិកឲ្យទៅចុះចត និងស្នាក់នៅក្នុងរយៈពេលយូរ ដើម្បីឈានទៅបង្កើតទៅជាមូលដ្ឋានអវកាសលើដីព្រះចន្ទ សម្រាប់ធ្វើជាទីតាំង ក្នុងការធ្វើដំណើរទៅកាន់ទិសដៅផ្សេងទៀត ជាពិសេស គឺគម្រោងបញ្ជូនមនុស្សឲ្យទៅចុះចតនៅលើភពព្រះអង្គារ ដែលណាសាគ្រោងធ្វើឲ្យបាននៅយ៉ាងយូរត្រឹមឆ្នាំ២០៣៣ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ