ខួប២ឆ្នាំនៃអំណាចលោកប្រធានាធិបតីអ៊ុយក្រែន ប៉េត្រូ ប៉ូរ៉ូឆេនកូ
ចុះផ្សាយនៅថ្ងៃ៖
ថ្ងៃពុធ ទី ២៥ឧសភា ឆ្នាំ ២០១៦ ជាខួបគម្រប់ពីរឆ្នាំគត់ តាំងពី លោក ប៉េត្រូ ប៉ូរ៉ូឆេនកូ បានជាប់ឆ្នោតជាប្រធានាធិបតីអ៊ុយក្រែន ប្រទេសដែលហែកហួរ ដោយទំនោរផ្តាច់ខ្លួនចេញ នៃតំបន់បះបោរនៅប៉ែកខាងកើត។ ចំណងសេដ្ឋកិច្ច ជាមួយប្រទេសរុស្ស៊ីជិតខាង ដាច់ដោច ទៅហើយ។ នៅអ៊ុយក្រែនផ្ទាល់ សេដ្ឋកិច្ចបានស្រុតចុះយ៉ាងខ្លាំង ទាំងអត្រារូបិយវត្ថុជាតិ ក៏ ធ្លាក់ចុះ ដាំដូង។ តើក្នុងរយៈពេល២ឆ្នាំនេះ ប្រជាប្រិយភាពលោកប៉ូរ៉ូឆេនកូ បានប្រែប្រួល យ៉ាងណា តើ ប្រទេសណាខ្លះ ជាអាទិភាពនៃដំណើរទស្សនកិច្ចរបស់គាត់ តើស្ថានភាព ហិរញ្ញវត្ថុ របស់គាត់ ក្នុងឋានៈជាមហាសេដ្ឋី បានស្ទុះឡើងយ៉ាងណាដែរ។
ជាបឋម គួរកត់សម្គាល់ថា ក្នុងស្ថានការណ៍នយោបាយ និងសេដ្ឋកិច្ចដ៏ស្មុគស្មាញ ស្ទើរសង្គ្រាម ស្ទើរសន្តិភាព លោក ប៉េត្រូ ប៉ូរ៉ូឆេនកូ បានថ្លែងនូវពាក្យសន្យាប្លែកៗយ៉ាងច្រើន ដែលពីក្នុងនោះ មួយចំនួនធំ ឥតមានបំពេញតាមឯណា។ ចំណែកអ្វី ដែលបានលេចចេញជា ផ្លែផ្កាមែន គឺ ក្នុងរយៈពេលនេះ នៅអ៊ុយក្រែន មានប្រព្រឹត្តទៅ ការបោះឆ្នោតសភា ដែលប្រកប ដោយតម្លាភាពកម្រិតខ្ពស់។ មិនតែប៉ុណ្ណោះ អ៊ុយក្រែន បានចុះ កិច្ចព្រមព្រៀងភ្ជាប់ខ្លួន ទៅនឹង លំហពាណិជ្ជកម្មសេរី ជាមួយសហភាពអឺរ៉ុប។ ហើយនៅទីបំផុត អ៊ុយក្រែន បានបំពេញតាម គ្រប់តែការទាមទារ សម្រាប់ទទួលបាន របបលើកលែងទិដ្ឋាការ ជាមួយសហភាពអឺរ៉ុប។
បើនិយាយអំពីប្រជាប្រិយភាពលោក ប៉ូរ៉ូឆេនកូ នោះគឺវាធ្លាក់ចុះមែនទែន។ គួររំលឹកថា ជាលទ្ធផលនៃការបោះឆ្នោតថ្ងៃ២៥ឧសភាឆ្នាំ២០១៤ គាត់ចេះទទួលបានការគាំទ្រ ពីអ្នកស្រុកម្ចាស់ឆ្នោត បានដល់ ៥៤,០៣% គឺលើសពី ពាក់កណ្តាលបូក១សម្លង ហើយក៏ឈ្នះ ឆ្នោត តាំងពីជុំទី១ទៅ។ ប៉ុន្តែ បើការបោះឆ្នោតប្រធានាធិបតីប្រព្រឹត្តទៅក្នុងខែឧសភានេះ ស្របនឹងការស្ទង់មតិ គឺមាន តែអ្នកស្រុកម្ចាស់ឆ្នោត ១៧,៩%ប៉ុណ្ណោះ ដែលត្រៀមបោះឆ្នោតឲ្យគាត់។ ទិន្នន័យនេះ បង្ហាញ ដោយ វិជ្ជាស្ថានអន្តរជាតិក្រុងគៀវខាងបញ្ហាសង្គមសាស្ត្រ យោងទៅលើ ចម្លើយរបស់ ពលរដ្ឋ ណាមានសិទ្ធិបោះឆ្នោត ដែលត្រៀមទៅបោះឆ្នោតមែន។
ស្របនឹងលទ្ធផលស្ទាបស្ទង់នោះ ប្រជាប្រិយភាពប្រធានាធិបតីសព្វថ្ងៃ គឺចាញ់ ប្រជាប្រិយភាព លោកស្រី អតីតនាយករដ្ឋមន្ត្រីអ៊ុយក្រែន Julia Timoshenko ដែលមានអ្នកស្រុកម្ចាស់ឆ្នោត ដល់ទៅ ២០,៩% ត្រៀមបោះឆ្នោតឲ្យគាត់។ ការស្ទង់មតិ ក៏សឲ្យឃើញពី ទំនោរធ្លាក់ចុះនៃប្រជាប្រិយភាពលោកប៉ូរ៉ូឆេនកូ ជាលំដាប់ គឺថា ក្រោយពីកន្លងផុតតែមួយឆ្នាំ បន្ទាប់ពីការបោះឆ្នោតឆ្នាំ២០១៤ គឺនៅខែឧសភាឆ្នាំ២០១៥ ប្រជាប្រិយភាពគាត់បានស្រុតពី ៥៤,០៣% ដល់ ៣២% ហើយនៅខែកញ្ញាឆ្នាំ២០១៥ដដែល គឺមានអ្នកស្រុកម្ចាស់ឆ្នោតតែ ២៥,៣% ដែលត្រៀមបោះឆ្នោតឲ្យគាត់ជាថ្មី។
ស្របនឹងសំណូមពរ ធ្វើដោយ សាខាប្រព័ន្ធផ្សព្វផ្សាយអង់គ្លេស BBC ដែលប្រចាំនៅអ៊ុយក្រែន ខុទ្ទកាល័យប្រធានាធិបតីអ៊ុយក្រែន បានផ្តល់ព័ត៌មានក្បោះក្បាយ អំពីដំណើរទស្សនកិច្ច លោកប្រធានាធិបតី ប៉ូរ៉ូឆេនកូ នៅបរទេស និងអំពី ការចូលរួមជាផ្លូវការរបស់គាត់ ក្នុងពិធី អន្តរជាតិនានា ក្នុង២ឆ្នាំកន្លងទៅ។ តាមការវិភាគនៃពួកអ្នកជំនាញអ៊ុយក្រែន គឺសកម្មភាពអន្តរជាតិ ដែលជាមុខព្រួញមួយដ៏ខ្លាំង របស់លោក ប៉ូរ៉ូឆេនកូ ក្នុងតំណែងជាប្រធានាធិបតីអ៊ុយក្រែន ដូចដែលមានតួលេខ បញ្ជាក់ ឲ្យឃើញស្រាប់។ អស់ ៤៦លើក គាត់បានបំពេញទស្សនកិច្ចផ្លូវការ និង ទស្សនកិច្ចការងារ នៅតាមប្រទេសក្រៅ គឺលើសឆ្ងាយសែនឆ្ងាយ ពី ប្រធានាធិបតីមុនៗនៅអ៊ុយក្រែន។
ប្រទេសជាអាទិភាពនៃទស្សនកិច្ចទាំងនោះ គឺ អាល្លឺម៉ង់ សហរដ្ឋអាមេរិក ក្រុង ព្រុចសែល ហៅម្យ៉ាងទៀតថាជា រដ្ឋធានីសហភាពអឺរ៉ុប។ សរុបទៅក្នុង២ឆ្នាំនោះ ប្រធានាធិបតីអ៊ុយក្រែន បានវត្តមាននៅក្រៅប្រទេស អស់ ៨១ថ្ងៃ។ ច្រើនជាងគេ គឺអស់ ៩ថ្ងៃគាត់បានស្ថិតនៅស.រ.អា ៨ ថ្ងៃ នៅអាល្លឺម៉ង់ ៧ ថ្ងៃ នៅស្វីស ៧ ថ្ងៃដែរ នៅបែលហ្ស៊ិក។ ហើយញឹកញយជាងគេ លោក ប៉ូរ៉ូឆរនកូ បានទៅកាន់ក្រុងព្រុចសែល រដ្ឋធានីសហភាពអឺរ៉ុប ជាទីដែលគាត់បានបំពេញទស្សនកិច្ចដល់ទៅ៦លើក ក្នុង២ឆ្នាំ កន្លងទៅ។ ក្នុងចំណោមប្រទេសមានន័យគន្លឹះ នៃសហភាពអឺរ៉ុប គាត់បាន ទៅកាន់ ប្រទេសអាល្លឺម៉ង់ ចំនួន៥លើក និង ៤ លើក ទៅកាន់ ប្រទេសបារាំង។
លោកប្រធានាធិបតី ប៉ូរ៉ូឆេនកូ បានធ្វើទស្សនកិច្ច នៅប៉ូឡូញ ៣លើក នៅស.រ.អា. ៣លើក នៅស្វីស ៣លើកដែរ នៅបេឡារុស ២លើក នៅ តួកគី ២លើក និង អ៊ីតាលី ២លើកដែរ។ បើនិយាយពីស្ថានភាពហិរញ្ញវត្ថុលោក ប៉ូរ៉ូឆេនកូ នោះតាមការវាយតម្លៃនៃទស្សនាវដ្តីអាមេរិកាំង Forbes គាត់ មានទ្រព្យសម្បត្តិ ១.៣០០លានដុល្លារ ហើយស្ថិតក្នុងចំណោមមហាសេដ្ឋី៩នាក់ នាំមុខគេ នៅអ៊ុយក្រែន។ គាត់ជាថៅកែ សហគ្រាសខាងផលិតស្ករសូកូឡា លុះទាល់តែ ត្រូវគេដាក់រហ័សនាមថាជា “ ស្តេចសូកូឡា “ សូម្បីតែនៅរុស្ស៊ី ប្រទេសដែលគាត់ហៅថា ជា“ ប្រទេសឈ្លានពាន “ ក៏គាត់ មានរោងចក្រ ផលិត សូកូឡាដែរ។
រួចពេលថ្មីៗ គាត់បាន បើក ឲ្យដំណើរការ នៅក្រុង ប៊ុយដាប៉េស្ត រដ្ឋធានីហុងគ្រី គឺហាងលក់ស្ករសូកូឡា ក្រោមម៉ាកថា Roshenជាពាក្យ ដកចេញ ពីត្រកូលគាត់ Po Roshen Ko ។ គាត់បន្តស្វែងរកទីផ្សារថ្មីៗ នៅ តាមប្រទេស សហភាពអឺរ៉ុប។ ជាការកត់សម្គាល់ ក្នុងរយៈពេល២ឆ្នាំក្រោមអំណាចគាត់ រូបិយវត្ថុជាតិអ៊ុយក្រែន ដែលមាន ឈ្មោះថា Hrivna បានស្រាលទម្ងន់ អស់៣ដង បើដូរទល់នឹង ដុល្លារស.រ.អា.។ យ៉ាងណាមិញ បើក្នុងខែមករាឆ្នាំ ២០១៤ មុនមាន” បដិវត្តន៍ពណ៌ “ កើតឡើងនៅក្រុងគៀវ ១ដុល្លារ ដូរបានតែ ៨,៣ Hrivna នោះ ឥឡូវ គឺដូរបានដល់ទៅ ២៥ Hrivna។
ស្ថានភាពហិរញ្ញវត្ថុអ៊ុយក្រែនបច្ចុប្បន្ន គឺយ៉ាប់យ៉ឺន ដោយអាស្រ័យ នឹង ឥណទានផ្គត់ផ្គង់ ពីខាង មូលនិធិរូបិយវត្ថុអន្តរជាតិ FMI ដែលផ្តល់ទៅ គឺក្រោមល័ក្ខខ័ណ្ឌ តម្រូវ ឲ្យអ៊ុយក្រែន មួលខ្ចៅបន្តឹង ការចំណាយ សម្រាប់ផ្នែកសង្គមកិច្ច ហើយដំឡើងថ្លៃថាមពល អគ្គិសនី ឧស្ម័ន សម្រាប់ការប្រើប្រាស់របស់អ្នកស្រុក ដូចថ្លៃដែលអនុវត្តនៅតាមប្រទេសបស្ចិមលោក ម៉្លោះហើយ បានជាគេនាំគ្នាថ្ងូរទៅហើយ។ ខាង ស្តុករូបិយវត្ថុ និងមាស ហៅថា ទុនបម្រុង អន្តរជាតិ អ៊ុយក្រែន តាមតួលេខខែឧសភានេះ គឺ មានទឹកប្រាក់តែ ១៣.២៤០លានដុល្លារ ឬ ៣០ដង តិចជាងរុស្ស៊ី ដែលក្នុងខែឧសភានេះ មានទំហំ ដល់ជាង ៣៩០.០០០លានដុល្លារ។ ប៉ុន្តែ ក្នុង” ទិវាអឺរ៉ុប “ នាថ្ងៃ ២១ឧសភាកន្លងទៅ លោកប្រធានាធិបតី ប៉េត្រូ ប៉ូរ៉ូឆេនកូ បានហៅ អ៊ុយក្រែនរបស់គាត់ថា ជា “ រដ្ឋស្ថិតនៅជួរមុខ ខាងការពារអឺរ៉ុប ពី ប្រទេសរុស្ស៊ីព្រៃផ្សៃ” ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ