ក្រសួងបរិស្ថានកសាងដំរីពីរណារយន្តដើម្បីបង្ហាញពីការបង្ក្រាបបទល្មើសព្រៃឈើ
រណារយន្តជាង៣០០គ្រឿង ដែលរឹបអូសបាននៅក្នុងយុទ្ធនាការបង្ក្រាបបទល្មើសធនធានធម្មជាតិ ត្រូវបានក្រសួងបរិស្ថានយកទៅកែច្នៃដំឡើងជារូបសំណាកសត្វដំរីមួយក្បាល។ លោក នេត្រ ភក្ត្រា អ្នកនាំពាក្យក្រសួងបរិស្ថាន បានថ្លែងឲ្យដឹងនៅថ្ងៃអាទិត្យ ទី១៣តុលានេះថា ការកសាងរូបដំរីពីរណារយន្តនេះ មានន័យសំខាន់ពីរ។ ទី១៖ គឺបង្ហាញពីរណារយន្តដែលជនទុច្ចរិតប្រើប្រាស់ដើម្បីបំផ្លាញធនធានធម្មជាតិ។ និងទី២៖ គឺចង់ពញ្ញាក់ស្មារតីរបស់ប្រជាពលរដ្ឋឲ្យចូលរួមការពារនិងអភិរក្សហ្វូងសត្វដំរីនៅកម្ពុជាឲ្យបានគង់វង្ស។
ចុះផ្សាយនៅថ្ងៃ៖
មានកម្ពស់២ម៉ែត្រ៨តឹក និងប្រវែងរហូតដល់ទៅជាង៣ម៉ែត្រ! រូបសំណាកសត្វដំរីដែលធ្វើពីវត្ថុតាងរណារយន្តនេះ ត្រូវបានសាងសង់ចប់សព្វគ្រប់ជាស្ថាពរហើយ។ លោក នេត្រ ភក្ត្រា អ្នកនាំពាក្យក្រសួងបរិស្ថានបានបញ្ជាក់ប្រាប់ថា ក្នុងពេលដ៏ខ្លីខាងមុខ ក្រសួងនឹងយករូបសំណាកដំរីនេះ ទៅដាក់តាំងបង្ហាញជាសាធារណៈនៅសួនឧទ្យានសែនមនោរម្យ ក្នុងខេត្តមណ្ឌលគិរី។
បើតាមលោក នេត្រ ភក្ត្រា ទម្រាំតែរូបសំណាកដំរីនេះសម្រេចរូបរាង គេត្រូវប្រើពេលសាងសង់រហូតដល់ទៅ៧ខែ ដោយប្រើប្រាស់វត្ថុតាងរណារយន្ត ផ្លែរណារយន្ត ព្រមទាំងគ្រឿងម៉ូតូប្រព្រឹត្តបទល្មើស សរុបចំនួន៣០០គ្រឿង។ វត្ថុតាងទាំងនេះ ត្រូវបានសមត្ថកិច្ចបង្ក្រាប រឹបអូស និងប្រមូលរក្សាទុកនៅតាមបណ្ដាស្នាក់ការដែនជម្រកសត្វព្រៃទាំង៥តំបន់ ក្នុងភូមិសាស្ត្រខេត្តមណ្ឌលគិរី។ ចំពោះការសាងសង់រូបសំណាកសត្វដំរីវិញ អ្នកនាំពាក្យក្រសួងបរិស្ថានឲ្យដឹងថា ធ្វើឡើងដោយជាងនៅក្នុងខេត្តកំពង់ស្ពឺ តាមរយៈការចូលរួមគាំទ្រថវិកាពីសប្បុរសជន និងអង្គការដៃគូអភិវឌ្ឍនានា។
គួរជម្រាបថា តាមរយៈរូបសំណាកដំរីធ្វើពីរណារយន្តនេះ ក្រសួងបរិស្ថានមានបំណងបង្ហាញដល់ពលរដ្ឋ អំពីវត្ថុតាងរណារយន្ត។ រណារយន្តដែលជាមធ្យោបាយសំខាន់របស់ជនទុច្ចរិតក្នុងការកាប់បំផ្លាញព្រៃឈើ និងរុករានទន្ទ្រានដីព្រៃរបស់រដ្ឋ។ ក្រៅពីនេះ ក្រសួងក៏ចង់ពញ្ញាក់ស្មារតីប្រជាពលរដ្ឋឲ្យចូលរួមសកម្មភាពការពារនិងអភិរក្សហ្វូងសត្វដំរីរស់ផងដែរ ក្នុងគោលដៅបង្កើនប្រាក់ចំណូលសម្រាប់វិស័យទេសចរណ៍នៅក្នុងខេត្តមណ្ឌលគិរី។
ជាការកត់សម្គាល់ សព្វថ្ងៃនេះ មានសត្វដំរីព្រៃចំនួនជាង៥០០ក្បាលកំពុងរស់នៅក្នុងប្រទេសកម្ពុជា។ ក្នុងនោះ សត្វដំរីព្រៃនៅក្នុងដែនជម្រកសត្វព្រៃនៃខេត្តមណ្ឌលគិរីមានចំនួន៣៧៥ក្បាល និងនៅតំបន់ជួរភ្នំក្រវ៉ាញមានចំនួនជិត២០០ក្បាល។ យ៉ាងណាក៏ដោយ ចំនួនសត្វដំរីព្រៃនៅក្នុងធម្មជាតិ ទាំងនៅកម្ពុជា និងនៅក្នុងតំបន់ មានការធ្លាក់ចុះច្រើននៅក្នុងរយៈពេលប៉ុន្មានទសវត្សចុងក្រោយនេះ ដោយសារតែការបរបាញ់ខុសច្បាប់ ការបំផ្លាញជម្រកសត្វដំរី ក៏ដូចជាជម្លោះជាមួយមនុស្សនៅពេលដំរីចូលមកស៊ីដំណាំក្នុងចម្ការជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ